بازدید امروز : 428
بازدید دیروز : 136
گنجعلی صباحی 1285-جی گونش ایلی‌نین دوندوران آییندا، "مرند"شهری‌نین یاخینلیغیندا "قانلی داغ" اته‌گینده یئرلشن "میاب" کندینده دونیایا گؤز آچمیشدیر. آتاسی‌نین آدی یونوس اولوبدور.[1]
1292-جی گونش ایلینده، 7 یاشی اولارکن، یوخسوللوق فیشاری آلتیندا عاییله‌سی‌ایله بیرلیکده آرازین قورئیینه کؤچور و "گده‌بَی"ناحیه‌سینده ساکین اولور. گنجعلی‌نین آتاسی گده‌بَی‌ین معدنلری‌نین بیرینده چوخ آغیر شرایطده ایشله‌ییردی. 1914- ینجی ایلده بیرینجی دونیا ساواشی‌نین باشلانماسیلا، گنجعلی‌نین عائیله‌سیده یاشادیقلاری یئردن "شامخور" منطقه‌سینه کؤچور و بو ناحیه‌ده یونوس کیشی اؤز اوغلو گنجعلی‌نین کؤمه‌گی‌ایله چؤره‌کچیلیک ایشینه مشغول اولور.
گنجعلی صباحی 15 یاشیندایکن، آتا- آناسی‌نین تکلیفینی نظره آلاراق، قونشولاری‌نین 15 یاشلی قیزی "حبیبه" ایله ائوله‌نیر و سونرالار عؤمرونون ان آغیر گونلرینی بو مئهریبان و فداکارلیق سیمبولو اولان قادینلا باشا وورور و چوخ اوشاقلی بیر عائیله‌نین آتا، آناسی اولورلار.
گنجعلی یئددینجی صینیفی قورتاردیقدان سونرا، اورتا و عالی تحصیلینی داوام ائتدیرمک اوچون گنجه‌یه و یاخود باکی‌یا گئتمه‌لی‌ایدی. نهایت حیات یولداشی و آتا- آناسینی راضی سالیر و 1924- ینجی ایلده گنجه شهرینده یئنی آچیلمیش عمله فاکولته‌سینه داخیل اولور.
1929- ینجی ایلده اورتا مکتبی قورتاریب، باکی‌دا پئداگوژی انیستوتونون دیل و ادبیات شؤعبه‌سینه داخیل اولور و اورادا سونرالار آزربایجان تورکجه‌سی و ادبیاتیندا فعالیت ائده‌رک، شؤهرت صاحیبی اولموش حمید آراسلی، دمیرچی‌زاده، محمد راحیم و احمد احمدزاده کیمی علمی و هنری شخصیتلرله همکیلاس اولور و اونلارلا اونودولماز خاطیره‌لری یاشاییر.
1928-جی ایلده، گنجعلی اورتا مکتبی قورتارارکن، عالی تحصیللی بیر موعلیم کیمی گده‌بَی-ه گؤنده‌ریلیر. او مکتب ایشلریله یاناشی، یئنه‌ده ایجتیماعی فعالیتینه داوام وئریر، خوصوصیله تئاتر و صحنه ایشلرینده جیددی فعالیت گؤستریر و کیچیک اینتیقادی پیئس‌لر یازیب، تاماشایا قویماقدان‌دا چکینمیر.
1932- ینجی ایلده گده‌بَی اورتا مکتبینه مودور تعیین اولور و بیر ایل بو وظیفه‌ده چالیشاندان سونرا، شامخورا مکتب مودورو سئچیلیر و یورولماز فعالیتی سایه‌سینده، بو مکتب معارف شؤعبه‌سی طرفیندن نومونه مکتب آدینا لاییق گؤرونور. [1]
1937-جی ایل یایین سون آیی، مرکز‌دن اسن قارا یئل شامخور منطقه‌سینده بورویور. سووئت وطنداشلیغی پاسپورتو اولمایان شخصلر، خوصوصیله ایران تبعه‌لری، جمعی صورتده توتولوب،حبس اولونورلار. گنجعلی‌ده آتاسی‌لا بیرلیکده یاخالانیر و شامخوردا یاخالانان بیر چوخ ایرانلیلار کیمی گنجه شهرینه گونده‌ریلیر.
نهایت 22 آی زیندان‌دان سونرا، گنجعلی حقینده توتولموش قرار اونا اعلام اولور. او 5 ایل عاییله‌سیله بیرلیکده شیمالی قازاغیستانا تبعید اولور و 1938-جی ایل اوکتوبر آیی‌نین 24-نده قازاغستانین سیبیره قوووشان شیمال حیصه‌سینه یولا سالینیر. [1]
ایکینجی دونیا ساواشی‌نین داوامی گنجعلی‌نین جزا حؤکمونو 5 ایل‌دن 8 ایله قده‌ر اوزادیر. نهایت 1945- ینجی ایل مای آیی‌نین اونوندا، رادیولاردان وئریلن ، "موحاریبه قورتاردی! " خبری یاییلیر. ساواشین قورتارماغی بوتون سورگون ائدیلن‌لره وطنه دوغرو قاییتماغا ایمکانی یارادیر. 1946- ینجی ایلین ژانویه آییندا، گنجعلی و عاییله‌سی‌نین پاسپورتلاریدا ویزا قویولموش حالدا، اونلارین الینه چاتیر. آوریل آیی‌نین 15-ده گلیب باکی‌یا چاتیرلار. اوردا یاشایان تانیش و دوستلار، گنجعلی‌نی، گونئی آزربایجاندا اینقیلاب اولوب- دئیه تبریک ائدیرلر. یئددی یاشیندا هله اوشاق ایکن دوغما یوردو "میاب" کندینی ترک ائدیب، آرازین اوتایینا گئده‌ن گنجعلی، نهایت 40 یاشیندا ایکن، آنا وطنه دوغروگئری دونور. 1324-جو ایلده، میلی حوکومت زامانی، تبریز رادیوسونون ادبی بوراخیلیش شؤعبه‌سینده خالق شاعیری بالاش آذراوغلو ایله امکداشلیق ائدیر و تبریز بیلیم‌یوردونون دیل و ادبیات شؤعبه‌سینده‌ده تدریس ائتمه‌یه باشلاییر. [1][3]
1324-جو ایل، آذرین 23-ده توتولور و مینلر آزربایجانلی کیمی ایشکنجه آلتینا آلینیر. نهایت "موهاجیر" و "متجاسر" آدی‌لا نئچه آی زینداندا قالدیقدان سونرا، لورستانین بدرآباد منطقه‌سینده یئرلشن "قلعه مظفر"ه سورگون ائدیلیر و ایکی ایل اورادا قالماق مجبورییتینده قالیر. [
1327-جی ایل شاه "عفو عمومی" اعلان ائدیر و بئله‌لیکله گنجعلی سورگوندن یئنه‌ده تبریزه قاییدیر. آنجاق اودا بیر چوخلاری کیمی اصیل معنادا عفو اولمامیشدی. تبریزده هئچ بیر ایش تاپا بیلمیر ، هارا گئدیرسه، بیر سابیقه‌لی موجروم کیمی اونو قارشیلاییرلار. موختلیف ایتیهاملار ووروب و اونو یاشاماقدان بئزیرتمه‌یه چالیشیرلار. بو دؤزولمز شراییط بیر یاندان، دولانیشیقلاری‌نین چتین اولماسی‌ایسه باشقا بیر یاندان، گنجعلی‌نی تبریزدن چیخماغا وادار ائدیر و نهایت 1329- ینجی ایلین باهاریندا عاییله‌سیله بیرگه، تئهرانا کؤچور و قارداشی – گؤرکملی رژیسور صمد صباحی- نین یاردیمی ایله ایشه باشلاییر.
. “28 مرداد” کودتاسی سونرا گنجعلی صباحی یئنیدن تعقیبه، آزار – اذیتلره معروض قالیر و ایجتماعی حاقلاردن محروم کیمی، آغیر ایللری باشدان کئچیریر. بو محرومیت‌لر، سونرالار ساواکین تئز- تئز سورغو- سووال‌لاری‌لا کامیلله‌شیر و بهمن انقلابی‌نین غلبه‌سینه قده‌ر اوزانیر. [1]
چاغداش دموکراتیک نثریمیزین آتاسی، اوستاد گنجعلی صباحی 1368- ینجی ایل زومار آیی‌نین 15-ده، 83 یاشیندایکن دونیاسینی دَییشیر و ابدیته قوووشور.[2]
گنجعلی صباحی‌نین تئهراندا یاشاماغیدا چوخ آغیر اولور، آنجاق او روحدان دوشمه‌دن، اؤز اجتیماعی و ادبی فعالییت‌لرینه داوام وئریر. خوصوصیله نفتین میللی‌لشمه حرکاتی آلتیندا یارانان سیاسی آتموسفرده، او یولداشلاریلا بیرلیکده "آذربایجانلی‌لار انجومنی" و بو انجومنین یانیندا " آذربایجان یازیچیلار و شاعیرلر مجلیسی"نی1331- ینجی ایلده یارادیر و تئهراندا نشر اولان "بشریت" و "بشیر آینده" گونده‌لیکلری و چوخ تیراژلی "چلنگر" درگیسینده اؤز اثرلرینی یایماغا باشلاییر. گنجعلی‌نین "خائین" عونوانلی حیکایه‌سی ایلک دفعه چلنگر درگیسی‌نین سون اوچ ساییندا چاپ ائدیلیر.
1357- ینجی ایل بهمن انقیلابیندان سونرا، یاشی‌نین چوخ اولماغینا باخمایاراق تئهراندا "آذربایجان یازیچیلار و شاعیرلر جمعییتی" و " آذربایجان انجمنی" نین یارانماسیندا جییدی ایشتراک ائدیر، "یولداش" ، "وارلیق" ، "اینقیلاب یولوندا"، "اولکر" و ... مجله‌لرینده اؤز حیکایه و ادبی- تنقیدی یازیلاریلا چیخیش ائدیر، ادبی محفیللرده بیر آق‌ساققال کیمی حوضور تاپیر، تئهراندا یاشایان شاعیرلر و یازیچیلار جمعییتی‌نین اورگانی عونوانی‌ایله نشر اولونان "گونش" مجلله‌سی‌نین بانیسی و آپاریجیلاریندان اولور، ایللر بویو ایشیق اوزو گؤرمه‌یَن اثرلرینی چاپا حاضیرلاییر و آزربایجانین موختلیف شهرلرینده قورولان ادبی مراسیملرده ایشتراک ائدیر. بئله‌لیکله، اونلار ایل اوره‌یینده چکدیگی آغریلاری آزادلیق شیرینلیگی‌ایله دییشدیرمک ایسته‌ییر.[1]
اؤتن گونلریم رومانی ایکی فرقلی چئویرمن و یایین ائوی واسیطه‌سی ایله فارسجا چئوریلیبدیر:
اوستادین دیریلیک زامانیندان پلانلاشمیش آغیرلاما، اونون وفاتی ندنی‌ایله باش توتمور. نهایت 17/7/1383 ده تئهرانین بهمن آدلی مدنیت ساراییندا گنجعلی صباحی آدینا طنطنه‌لی بیر آخشام گئچیریلدی. بو مراسم ده بیر چوخ آزربایجان یازیچیلاری، شاعیرلری، ضیالیلاری، ژورنالیستلری، ادبی درنکلری و قلم اؤیه‌لری ماراقلا ایشتراک ائدیب او داهی‌نین عزیز خاطیره سین داها عزیرلندیرمیشلر. ساهر، صابر و نباتی ادبی انجومنلری، آذری مجله‌سی و خانه فرزندان آذربایجان بو آغیرلامانی قورولانلانداندیرلار. [1][2]
لیست کل یادداشت های این وبلاگ
لوگوی دوستان
درباره خودم
پیوندهای روزانه
فهرست موضوعی یادداشت ها
بایگانی
اشتراک
