بازدید امروز : 150
بازدید دیروز : 75
ایها الناس ویرون همتلن رای منه
منی وادارایلیون شرکت ایدوم انجمنه
شاعرم شعریله هر مطلبی تحریر ایده‌رم
قاری‌یم آیه‌نی اوز شائنیمه تفسیر ایده‌رم
سیل یخان ایولری بیر هفته‌ده تعمیر ایده‌رم
لادیمز حکمیمه مستاجر اولا یا سکنه
ایها الناس ویرون رای منه
قویمارام شهریده بیر ذره کثافت اثری
گرک آسفالت اولونا شهریمیزین کوچه‌لری
گوره‌سوز اوندا که آیا سوزیمون وار کسری
من فقط ماهه باش اگسم اگرم انجمه‌نه
قویمارام شهریمیزین بودجه‌سی گیتسون هدره
قویمارام ظلم اولا بیر مو قدری بیر نفره
ییرم شام نهارا یاغ دوگی صبحانه کره
اوزه‌رم باشنی هر کیم سولسه هل پسنه
ایشی ترتیبه سالوم شهره ویروم نظم و نظام
مد امروزیله تعمیر اولا مسجدله حمام
ناقصاتی ایلیوم بیر ایلین عرضینده تمام
هامی بیر دفعه دیسون احسن او رای حسنه
نیه گورکان آلا قبرین بیرینه اللی تومن
نیه دینمور بو جماعت ایشه یوخ بیر یتیشن
بله اولسا قوجا دنیانی دوتار اولماز الن
اُلی گر اوز باشنا اولسا تریخلار کفنه
نه روا شایع اولا شهریده مشروب و زنا
دولدورا تکیه و مسجدلری تذویر و ریا
قویمارام رایج اولا بیر بله تنزیل و ربا
خلق ایچینده گنه مرسوم اولی قرض‌الحسنه
چوره‌گی میوه‌نی بازاردا فراوان ایده‌رم
هویجین آغ کلمین قیمتین ارزان ایده‌رم
اتی قصاب باها ساتسا اونی تاوان ایده‌رم
باسارام ایگنه‌یین‌لر قوسار آتدان تبنه
شاعرم منده قویون صنف رجاله قوشولوم
کارت و پارت و پلوویله پولوم اولسون خوش اولوم
سوخولوم باند ریاستلره غمدن قوتولوم
نولی بش گون قویاسوز سرور اولام مرد و زنه
قویمارام کتلیه آشپز قوخوموش کفته ویره
بیری اصنافی سویوب جنسین آلا سفته ویره
اوغلانا شوخ مه‌مه قزلار اُپوشی مفته ویره
بوسه‌نین هر جوتی قاخسون گرک آتمیش تومنه
منی شهر اهلی تانور من بو ایشین ماهری‌یم
رئسا تک تکی موسا اولا من سامری‌یم
نابلد کی دگولم شهریویزین شاعری‌یم
یوخ خیانت نظریم دولته دینه وطنه
سویرم منده چاتام منصبه آدیم یکله
یاغلی مجانی پلولارییه قارنیم دیکله
ساری رنگیم دورولا بو تیشی قیشلارکوکله
یاخشیلیق دوره سیدی سن منه یان منده سنه
من اگر رای آپارام خوش سیزون احوالیزه
مرحبا طالعوزه شانسوزا اقبالویزا
جد و جهدیله یتورم سیزی آمالویزه
دده سوز سیز منه عورتلریویز مثل ننه
حاضرم هر ایشوز اولسا دیمیون دال چاتارام
بله فکر ایلمیون سیزلری گوزدن آتارام
یری گورمز گوزوم اوندا باشیمی دوز دوتارام
دیمرم گیچدی سودان ایشکیم ایندی منه نه
گله لازمدی حمامدا سو پولی بش قرانا
تا گیده سطح نظافت یوخاری خلق اویانا
شهر حسرت قالا قیللی ... کیرلی دابانا
یاسمن گونده ورا شانه او زلف سمنه
نولی بش گونده کریمی اولا بیر جمعه آقا
داراشا بوغلی پشیک تک بالا قیماقه یاغا
بولیسوز هر ایشیویزده دوشرم من قباقا
ملکم ایندی من اوندا دونرم اهریمنه
کریمی مراغه‌ای
لیست کل یادداشت های این وبلاگ
[ شناسنامه | مدیریت | ایمیل | خانه ]
موضوعات وبلاگ
لینک دوستان
لوگوی دوستان
درباره خودم
پیوندهای روزانه
حضور و غیاب
یــــاهـو
فهرست موضوعی یادداشت ها
بایگانی
اشتراک
