بازدید امروز : 248
بازدید دیروز : 218
ایندیه‌تک بیله بیلوردم خانم
هرزه و هزیاندی ریاست میزی
ایندی اوتوردوم گورورم آی جانم
تخت سلیمان‌دی ریاست میزی
آخ نئجه راحت نئجه اگلشملی
هر نئجه یورقون اوتوسا دینجلی
چوخ یوموشاق سلقلی کیف سورملی
لایق سلطان‌دی ریاست میزی
میز نئجه میز اگلشنی جست ایدیر
رند و خرابات و قوی دست ایدیر
بی می و مینا آدامی مست ایدیر
رتبه‌ی شایان‌دی ریاست میزی
باخما کیچیک گورسنوری ظاهری
تک بیر آدامدان چوخا یوخدور یری
قوی الیوی آننوا باخ بیر چری
بیر یکه میدان‌دی ریاست میزی
میز نئجه میز نشعه‌ی ممتازی وار
موشک و جت تک گویه پروازی وار
باشدان آلور هوشی عجب گازی وار
محفل رندان‌دی ریاست میزی
ایلمه غم فخرایله شیش آی ماتان
من رئیس اولدوم کفیمه یوخ چاتان
صدر نشینم دگولم شارلاتان
دردیمه درماندی ریاست میزی
واردی عجب معجزه‌سی بو میزین
کور ایدیر اوّل‌ده جلیسین گوزین
نه جلو ایستور نه اوزنگی نه زین
مین‌ملی مادیاند‌دی ریاست میزی
دورسا حضوریمده اگر یوز نفر
سایمارام ایشکدی بولار یا بشر
یا بیر اوطاق کتلی یا بیر طویله خر
بیزلره یکساندی ریاست میزی
آخ نئجه میز وار نه گوزل نقشه‌سی
اَل قول آچانمور سویورام هر کسی
اُلدویرورم هر کیمی چخمور سسی
مسلخ انساندی ریاست میزی
سخت اولا قانون نئجه مثل دمیر
من اونی الده ایده‌رم چون خمیر
اولموشام ایندی ایله روشن ضمیر
مکتب عرفاندی ریاست میزی
میز نئجه میز جنگده ارابه‌دی
دللری یاندیرماقا خوش تابه‌دی
خون ضعیفان بیزه نوشابه‌دی
باشدان ایاق قاندی ریاست میزی
مؤمن اولا گبر اولا اسلام اولا
یوخ منه فرقی چاتارام قول قولا
دینی فدا ایلمیشم من پولا
دینله دشماندی ریاست میزی
بو مثلی خوش دیدی احمد کوسا
ارمنی‌لیق یاخشیدی کبلای موسا
لیک قیامتده پوخی چخماسا
مسند شیطان‌دی ریاست میزی
عصر بیزیم عرصه‌ی میدان بیزیم
قصر بیزیم حوری و غلمان بیزیم
نفس بیزیم نعمت الوان بیزیم
معرض طغیان‌دی ریاست میزی
ظالمی مظلوم ایلسم ایلرم
حاکمی محکوم ایلسم ایلرم
هر کسی مسموم ایلسم ایلرم
مرکز بهتاندی ریاست میزی
دائم الیمده ایکی مثقال قلم
ایسته‌سم عالملری ووررام به هم
پولدی پول اُستن یاغوری دم به دم
گورملی دکاندی ریاست میزی
ملتی مین مین سویورام دویمورام
دولته دوقوز قویورام دویمورام
گونده اوتوز رنگ بویورام دویمورام
حیله‌ی الواندی ریاست میزی
زال منم رستم دستان منم
گیو منم سام نریمان منم
اهرمنم خصم سلیمان منم
مسکن دیواندی ریاست میزی
دویمارام اصلاً بله سرمایه‌دن
یوخدی سراغیم خبر و آیه‌دن
سنماسین ای کاش بو میز پایه‌دن
ثروت و ساماندی ریاست میزی
بس دی کریمی سوزی قاتما سوزه
سورمه آتون داشلقا قیتر دوزه
چکمه داخی ملتی چوخدا اوزه
یازمالی عنوان‌دی ریاست میزی
شاعیر: کریمی مراغه‌ای
لیست کل یادداشت های این وبلاگ
[ شناسنامه | مدیریت | ایمیل | خانه ]
موضوعات وبلاگ
لینک دوستان
لوگوی دوستان
درباره خودم
پیوندهای روزانه
حضور و غیاب
یــــاهـو
فهرست موضوعی یادداشت ها
بایگانی
اشتراک
