تورکو بیر چشمه ایسه من اونو دریا ائله دیم،

بیر سویوق معرکه نی محشر کبرا ائله دیم.


بیر ایشیلتی ایدی سها اولدوزو تک گورسنمز،

گوز یاشیملا من اونو عقد ثریا ائله دیم.


اومودوم وارکی بو دریا هله اوقیانوس اولا،

اونا ضامین بو زمینه کی مهیا ائله دیم.


عرفانا چاتماسا شعرو ادب، ابقا اولماز،

منده عرفانا چاتیب شعریمی ابقا ائله دیم.


ابدیتله یاناشدیم دوغولا حافیظه تای،

شیرازین شاهچراغین تبریزه اهدا ائله دیم.


تورکونون جانینی آلمیشدی حیاسیز طاغوت،

من حیات آلدیم اونا حق اوچون احیا ائله دیم.


فیض روح القدس اولدی مددیم حافیظ تک،

منده حافیظ کیمی اعجاز مسیحا ائله دیم.


قمه قداره لر آغزیندا دیل اولموشدو سویوش،

من سئوینج ائتدیم اونی، خنجری خورما ائله دیم.


ایندی گوللرده گوزل صفله صفاایله گزیر،

منجلابلاردا اوزن اوردگی دورنا ائله دیم.


باخ کی حیدربابا افسانه تک اولموش بیر قاف،

من کیچیک بیر داغی سرمنزل عنقا ائله دیم.


بوردا روشن ضمیرینده هنرین یاد ائده لیم،

من اونوندا قلمین طوطی گویا ائله دیم.


نه تک ایراندا منیم ولوله سالمیش قلمیم،

باخ کی تورکییه ده قافقازدا نه غوغا ائله دیم.


باخ کی تهراندا نه فرزانه لر اولموش واله،

باخ کی تبریزده نه شاعیرلری شیدا ائله دیم.


هم سهندیه سهندین داغین ائتدی باش اوجا،

هم من اوز قارداشیمین حقینی ایفا ائله دیم.


آجی دیللرده شیرین تورکو اولوردو حنظل،

من شیرین دیللره قاتدیم اونو حلوا ائله دیم.


هرنه قالمیشدی کئچنلردن ائله بال پتگی،

اریدیب موملو بالین شهد مصفا ائله دیم.


تورکو، واللاه ، آنالار اوخشاغی، لایلا دیلیدیر،

دردیمی من بو دوائیله مداوا ائله دیم.


شهریار، حیف سویوخدور بو دگیرمان هله ده،

دارتماغا یوخدو دنی ،منده مدارا ائله دیم.

یازان:  شهریار