بو آخشام ؛ یاتدیغیم خسته خانادا                                          

 گوروشه گله نیم عزراییل اولدو

جانیمی آلماغا الینده فرمان                                                  

 غفلتی ؛ قارشیمدا او ؛ نازل اولدو

=+=

عزراییل الیمده قلم گورنده                                                     

   اوتاندی ؛ آلنیندان تر آخدی ؛ گئتدی

قلمین حورمتین ساخلاسین دئیه                                          

  منی اوز حالیما بوراخدی ؛ گئتدی

+=+

یوخ ! بلکه ؛ اولوم ده قلم دن قورخور                                    

  نئجه کی ؛ بیر زامان ناپئلون قورخدو

حاکیم لر ایچینده قلمدن قورخان                                           

  اولومدن قورخاندان یوز کره چوخدور

=+=

حایاتدا هئچ نه دن قورخمادیم – دئدی                                  

  بونو قئید ائتمه سم ؛ منه عییب دی :

قلم صاحب لری ؛ بیر چوخ گئجه لر                                            

 گوزومو یوخویا حسرت قویوبدی

=+=

هم ده گل قلمین مقامینا باخ                                                        

  قرآندا ؛ اونا آند ایچیب دیر تانری

سایی سیز – حساب سیز یاراتدیغیندان                                         

نه اوچون قلمی سئچیبدیر تانری ؟

=+=

ایسته یب دئسین کی ؛ بو کایناتدا                                              

   بوتون هر قوه یه فایق دیر قلم

حق سوزو یازماقدان قیزیر قانماسا                                               

 تانری نین آندینا لایق دیر قلم .

25/3/90 – تبریز