نمونه مدرسه¹

آی کیشی بیلمم نه اولوبدور سنه         دردینی گیزلتمه بیان ائت منه

صوبح چاغی شادو خراماندون               آی نه گؤزل سئوملی انساندون

بال کیمی شیرینیدی هر بیر سؤزون      بنده یه باخدوخجا گولوردو گؤزون

هر سؤزه اولموشدو جوابون جانا           لبلرون او خشوردی گول خندانا

محسنه گاهی بو یوروردون بالا            حق گؤروم چینوه خلعت سالا

یاخچی آغاتدین آتانین صورتین           حفظ ائله دین حورمتین حیثیتین

                      قویمادین آرزیم اوخی دئیسین داشا        

 هوشدا فراصتده چکیب سن منه          سن منه فخر ائیله اوغول من سنه   

 آی کیشی شاد ائتدی منی گولمگون        مین دیلیلن قیزلاری دیندیرمگون   

 صوبح بو ائو خانه احسانیدی                   حاتم طائی بیزه مهمانیدی

گؤر میوب عمرومده اوطو شالواریم             آمما دیلون اؤلچوده ارشین یاریم

آرواد اودور غم گونی غمخوار اولا               اؤز ارینه یاخجی مددکار اولا

 ساخلاسا آرواد اگر اؤز حورمتین               ارده اونون فرض بیلر عزتین

چوخدا زنن سن آدین اولماز رشید             هرزه سؤزون مرزه جوابین ائشید

دوزدی سحر شاد و خرامانیدیم                سیز بینن سئوملی انسانیدیم

مدرسه ده دگدی قاپاز باشیمه                 قاتدی سویی ایسی اولان آشیمه

قاش قاباغیم بیله اگر ساللانیب                قول بوداغیم مدرسه ده داللانیب

گئتمیشیدیم محسنی یازدیرماقا               بنده نی حالی ائله دی بیر اقا

چون بو اوشاق نمره ده ممتازدی               کان ادب صاحب اعجازدی

اولگو اولوب جمله محصللره                      مشتری ییک بیزده بو جور گوللره

هامی دان آرتیق بیزه اوچون ارجی وار    آمما بئش اون تاختا سیزه خرجی وار

تاختا ندیر خرج نه دیر آی آقا                     لطف ائله بیر ذره سوزو خیردالا

 بنده نی عفو ائیله بیراز ساده یم             توت الیمی فکر ائله افتاده یم

باخدی آی ارواد ائله بوز بوز منه               سانکی نوکر اربابا وورموش تنه

باشیمه قیشقیردی او صاحب سخن         بیله دئدی تاختا اولار مین تومن

مدرسه میز مردمی دور آِی حاجی           چوپله پولی باخما منه قیقاجی

گاه بیچیردون کت و دامن منه                گاه تیکیردون تزه دون سوسنه

عالمه یه تای تای آلیر دون پفک             مهدی یه یخدان دولوسی نوش مک

صوبح چاغی آیری بیر انساندون            جسمیمه جان دردیمه درمانیدون

ایندی نه اولموش قیزاریب گؤزلرون        زهر هلاهل کیمی دور سؤزلرون

قاش قاباغون عین بولود ساللانیب         بالتا دییب قول بوداغین داللانیب

نور نومودوندان اوره گیم یاره دی            صور صوفتون قابل کفاره دیچ

چهره‌ن اولوب لب لبی نین پیشمیشی    دیل دگول آغزوندا ایلاندیر کیشی

گؤزدن آخیتما بو قدر آب غورا                 بورنووی اوخشاتما باری شیپورا

اوت غضبین قورخور اوشاخلار کیشی     اوز وئریرم ایستمه آستار کیشی

بسدیر آی آرواد منی چوخ دانلاما          وقته قالیر آغزیوی یوم بانلاما

صور صوفتیم نور نومودوم هر نه دیر       سن کیمی جیرانه برازنده دیر

من دئدیگون سن بویور آیا نه سن        اللی یاشین وار هله ده کؤرپه سن

هر نه جیبیمده واریدی آلدیلار            طعنه لرین پیسریمه چالدیلار

شرمیله ذکر ائیلیرم آرواد سنه           قیرمیزی خط چک کو تیلان دامنه

درس اوخویان چونکو چاتیر عزته         گئت گؤزلیم سنده یازیل نهضته

سؤزلر ائشیدیم او دبستانیده           مثلی اولانماز چالا میدانده

محضرینه عرض ائدیرم الغرض           سؤز چوخ اوزانسا اولاجاقدور مرض

ایندی کی اولاد وطن پخته دی         مین تومنین بیر آدی دا تخته دی

----------------------------------------

1= نمونه مدرسه /از کتاب یارالی دورنا /  عاصم اردبیلی /چاپ 1389 /صفحه 116